عارفة
هشام صبح
عارفة,
أجمل حاجة فيكى
انك لسه بتقدرى
وسط همومك دى كلها
تحلمى
بالضفاير
بالجدايل
بشعرك المفرود
تحت المطر
لسه بتقدرى
بلمسة منك تصحى ألف روح
كانو نسيو طعم رواقة البال
عارفة,
النهاردة عديت بالصدفة جنب مرايتك
اللى ياما هربت منها
اللى فوقيها صورة ليكى
مكنتش أنا
موجود فيها
معرفتش منين جه التراب ده كله,
مديت ايدى
مسحته
مشفتكيش
دققت أكتر
شفتنى
معرفتنيش
مش عارف
يمكن مش هى نفس الابتسامة؟
يمكن.............؟
ألف يمكن,
بس الأكيد,
بطلت أحلم
أحلام كبيرة
زى زمان
بقيت بحلم على الأد
بس ليه انتى بقالك كتير,
فى الحلم مزرتينيش؟
يمكن عشان كده معرفتنيش؟
والا يمكن.........؟
والا يمكن أكون غلطان؟
بس هى حاجة ناقصة,
حاجة تاهت من عينيا,
حاجة ضاعت من ايديا,
حتى بقية التراب
معدتش قادر أمسحه
