اديني جيت على بابك ومستني
تمدي دراعك المربوط ورا ضهرك وتاخديني
ياناكرة كل شيئ فيا
وفاكرة بس ترميني .!
بصي ف ملامحي وركزي من غير كسوف
هتلاقي كل اللي ف ملامحي
يدوب بواقي م الزمن
راشحة مع عرق الجبين
يدوب ملامح ذكريات
متشعلقة مابين وبين
عرفتيني؟؟
انا شاب لسة ف اول السكة
داس الجميع على حلمه بالجزمة
حاول وعافر واندبح علنا
وكأن دمه البكر مش ازمة
انا شاب لكن شيبتي فاضحاني
دفنوا سنيني ع المشاع
وف وطني وحداني
انا كنت حالة م الهوى
وصبحت شيئ تاني
وفضلتي واقفة هنا
وبرضة ناكراني
ليلى يابنت القلب
قلبي صبح كافر
معدش ينفع تضحكي ف يحن
معدش يقدر ع البكى ف الليل
ولا هيستحمل شروق الشمس
ماكنا بننتظر بالامس
ولا جيتي
ولا جيبتي معاكي ضي
اتسرسبي
من بين وريدي وابعدي
يمكن يحن الخلق
ف يزهدوا دبحي
يمكن تحسي بأن انا
دمي حرام
ياساكنة كل الاضرحة فيا
مابقتش انا الدرويش
ولا هقول وردك
مانا كنت فيكي ولي
لعنتني ليه ارضك
وقف الولاد الصبح ع الناصية
الدم سال
واتشعلقت احلامهم الفضة على الشباك
واقفين هنا
واقفين هناك
وانتي اللي ساكنة جوة حضن القصر
امتى تجيبي الشمس وتجيلهم
امتى تحني ع الاحبة يامصر ؟!!!!
يازمن
مفروض نعاتب بعضنا
مفروض تقولي مين أنا بعد اللي كان
فاكرك وفاكرني
ناكرك وناكرني
موشوم ف جسمي ضربتك
والحزن كاسرني
البنت دي
مكانتش صدفة م اللقا مرة
مكانتش لحظة م الهوى وعدت
برد اغترابي عنها
والرعشة لما تكون هنا
رقص المشاعر م الفرح
اوركسترا ضحكة عيونها
خلوا دمي يحتضن كل الشوارع
ينتفض يهتف بشوقها
لاجل مايلون عيونها ع الافيش
ينتفض تحت البيادة مينحنيش
بنت قلبي
جاية بكرة نصلي جهرا ف الميدان
بكرة مصر تعيش واعيش
وهنقول الكلام كله
بدون مونتاج
بدون مانداري اوجاعنا ورا ضكة
بتمدح ظلمكم لينا
ومش هنخبي احلامنا واغانينا
وايامنا اللي ماتت ف الخلا م البرد
ومش هنخاف
========
نص قديم لاقيته ف وسط الورق من قبل الجيش :D
