قالولي لما كنت صغير
بكره تحقق الأحلام
ولا عمرهم
في يوم عرفوا
بشوف انا ايه لما بنام
==============
مايمكن
طب
بشوف إني
بتوه منكم
مبرجعشي
مايمكن
كانت الأحلام
شئ مرفوض
مينفعشي
==============
أنا كداب
لا عمرهم قالوا
ولا عمري
حلمت زمان
أنا أصلا
ومن صغري
طردت الحلم
من أوضتي
وقفلت الباب
===============
ولا تسأل عن الأسباب
وشوف حلمك
كدا وياك
ولاّ هرب من الشباك
===============
أنا كداب
في مرة حلمت
إني كبرت
وبعرف أطير
سافرت بلاد
مشافها حد
غير العصافير
فيها ألوان متتعدش
وفيها كمان
حاجات ياما
كنت بروحها
مع نفسي
لحد ما قالوا
تاني إوعاك
تسيب نفسك
تسَهّيك
وتروح بيك
تاني لهناك
==============
ولا شرحولي ايه الأسباب
فلا تسأل عن الأسباب
وشوف حلمك
كدا وياك
ولاّ هرب من الشباك
==============
ومرة حلمت إني كبرت
-آه برضو مصمم ع الموضوع
مهو أصل العيل
في بلادنا
بيعيش متهني وموجوع-
كبرت أنا
وبقيت فنان
بيحس بكل ملامح الناس
بيشوف فيها
معني الإحساس
بيغير كدا بالريشه وبس
وعيون الكون
بتتفرج
علي كفه
بتمزج الألوان
لأ
بقيت شاعر
حروفه بتجري كمشاعر
مابين صفحة
وبين تانيه
وكتب ديوان
وكمان ديوان
وقلت في يوم
إني كتبت
بيتين م الشعر
هسمعهولكم
هنا دلوقت
" ------- "
بلاش أحسن
يوميها
قالوللي
متتكررش
ولسه انا فاكر
ذاك الوش
واتغيرت فجأة الناس
لا الأهل أهل
ولا الصحاب فضلوا صحاب
==============
ولا شرحولي ايه الأسباب
فلا تسأل عن الأسباب
وشوف حلمك
كدا وياك
ولاّ هرب من الشباك
==============
من بعدها بطلت أنام
لحد ما مرة
علي غفلة
خدوني عنيكي
م الدنيا
وم الأيام
بقيت بحلم
وأنا صاحي
وبدعيلك
في كل آذان
عشان خاطرك
فتحت الباب
وقلت للحلم
يتفضل
تغور الناس
سيبِك م الأهل والأصحاب
تغور علشانك
الأسباب
ولقيتني تاني
بعرف أطير
وبكتب شعر
لقيت في عنيكي
اصحاب زمان
العصافير
وشَعرك
كان دواية حبر
حسيت لحظتها
الدنيا
كما لو كانت
خلاص هتحن
وأن السما السابعه
مفتوحة
لا شياطين
هتمنعني
ولا عدت بخاف من جن
حبك
حققلي أحلامي
لا
دا حبك
هو نبع الحلم
خدتني النشوه
في كفك
وقلبي إتمادي
ع القوانين
وعرفت إنه بتتناسب
مرارة الوقعه
طرديا
مع حجم الحنين
فكان الوجع
لما انتهي
حلم السنين
فجأة
كما بدأ
فجأة
بنظرة عين
وجع يتقاس بعمر
الحلم
اللي
طردته زمان
وبجوز إقفال
قفلت الباب
==============
ماعادت تفرق الأسباب
فلا تسأل عن الأسباب
وشوف حلمك
كدا وياك
ولا هرب من الشباك
==============
وكبرت
بس المرادي بجدوالعمر عدي في هيصة
حاجات كتير
فيها غالي
وأغلبها رخيصة
الشَعر شاب
ولسه فِ دق ع الشباك
بيسألني عن الأسباب
خط العمر
في كفي
خلاص ابهت
وروحي
نفسها مرة
مع الأحلام تتمشي
حافية علي الأسفلت
فتحت الباب
اترمي الحلم
في حضني
وباس ضلوعي
غمضت
!!!
