الشاعر الواعد / نصر الدين سامى
كفر الشيخ /كفر الشيخ
دراويش المولد زاهدين في الحق
بيطاطوا لاول نسمه تضرب جدران العضم
بيخافوا الاعصار القادم
و لا مره الاعصار كان جد
دراويش المولد بسلاح مشلول
و الايد العاجزه مبتكتب غير كسر حروف
في قلب المتودك علي كل طريقه
عاش الخوف
غازل قوانين اللا وعي
سارق من حبات النني الضي
الخندق لساه متزمم
متخبي بين ضل حيطان
نايم فيه لبس الجندي
من اخر كلمه للارهاب
حاضن في عيون ارضي البكر
من دم الجندي تهموها الفجر
الارض بتتجوز من غير زفه
دخلتها البلدي تبرأها
و غريبه الارض بتتطلع زانيه
ارضي البكر بقت حبلى
مصلوبه علىشجرة تيهنا
الخندق واقف مجبور
زمان الخندق ادانوه
فاشل في اداءه للاعماله
و الفاشل مذلوله افعاله
خايف يرفع ايده بلأه
تتنفذ فيه الاحكام
الارض المصلوبه بتنازع
الطفل بيطلع مش خايف
الطفل الفاجر مش فاجر
يتكلم في المهد صغير
بيبرأ امه المظلومه
الجندي الميت كان ابويا
شهود الزيجه اتنين
الخندق و سلاحه المقتول
الاب الدرويش سواح
بيلف عيون كل الدنيا
بيلم العيله و الاولاد
و لسان الارض المقطوع
بيشاور ع الخندق
كان نفسه يقول
الارض شهيده عربيه
