الريس بلُّونه
الشاعر | أشرف مقلد
دسوق | كفر الشيخ
.......................
كافئ ظباطك واقتلنا
واسحلنا وقول دا شباب فلتان
واطلق لماليمك تشتمنا
أو سوقنا جميعا للسجان
أو حَكِّم قاضي بيعدمنا
أو شوه فينا وقول إخوان
وصِّي الاعلام ينشر عنا
اننا قابضين تمن الثوران
واننا عُمَلا وخاينين وانَّا
جهله وعايشين دنيا التوهان
زَوِّد ف سعارك واحبطنا
واكئبنا وحطم بكره كمان
وانشر اشاعاتك واشغلنا
شتت تركيزنا ف أي مكان
شدد ف احكامك واشكمنا
واشرب من دمي وبات سكران
فَصَّل قوانينك واحكمنا
وكأنك متعين سلطان
واتْزَف كإنَّا ف يوم حِنَّه
وكإنك سيد للعرسان
واتفرعن
بس إوعى استنى
خليك عارف إنك بُهتان
وانك بتحارب تلوينَّا
علشان جواك أصلاً بَهتان
وانك منفوخ واحنا وجيلنا
عارفين انك بالُّون دخان
وان انت هاتفضل في عيونا
آخرك دبوس والخدعة تبان
&&&&&&&&&&&&&&
1 يونيو 2014
