صاحب وجع
---------
محمد يوسف حامد
==============
متحفريش قبرك ف قلبى
وتقيمى ميتم ف الضلوع
انا قلبى مش ناقص دموع
انا قلبى محتاج لبراءه
طفله بتغنى الحروف
وصوت شادوف
يروى هوانا
بنغمه جيه من الحياه
مش دمعه جيه من القبور
اسالى عنى السطور
وحبر نازف م الوجع
ألفين وجع
تعرفى انى انا
صاحب وجع
صاحب مراكب شايله
احزان الوطن
وام شقيانه
على عيل يتيم
وبنت فاتها القطر وراح
شايل جراح
الحلم والمتعه
فى بيت راجل يستتها
يدوبها ف احضانه
حتى اطفالنا ف الشارع
بدون مأوى
تحت الكبرى تتلقح
ف عز البرد والسقعه
شوفتى الفجعه يا حبيبتى
قبور محفوره جوايا
وبير ضلمه
ودنيا فيا مهدومه
بايدك انتى تبنيها
تخليها عمار دايم
مش جبانه محدوفه
على اخر حدود العمر
او صحره بتسكنها
الضباع والبوم
خلينى كده مكتوم
احسن ليكى يا حبيبتى
