عماد عامر
عنتر نيو لوك
ما كانتش عبله
اللي بترسمها عيونه
على لون العصافير
كانت . . . واحده تانية
بتحب كل العناتر
اللي بيغرقوا ايديها
ببرفانات كريستيان ديور
و اضطر عنتر
انه يرهن سيفه الشهير
و يبدله بموبايل نوكيا
يمكن ترن عبله عليه
كل القبيله اللي زمان
رفضت جواز عنتر و عبله
انتشر فيها الجواز العرفي
لحد ان عنتر نفسه
كان متجوز تلاته
مسكينه عبله
. . . غيرت كذا الف لوك
و مش قادرة تغير النظرة الحزينه
اللي بتخبيها بالكحل التقيل
حتى عمارة الزيادي
صاحب سنترال بنو عبس
ما قدرش يضحك على روحه
قرر انه يسيبها و يتجوز
ارملة شداد
اه على قبيله شيبان
نسيو الحروب اللي كتير
حاربوها بسبب او من غير
و اضطروا يدخلو ف حلف الناتو
و اعداء الحروب
و . . .
ما علينا
المهم ف عنتر
بطل القصيدة
اللي لسه بيقّدم ف اعلانات
البودي جاردات
و كل امواله رايحه
على شحن الموبايل
و اشتراكات الجيم
بقى عنتر اسمه . . . عنتر بوند
عنتر
بيحب عبله اوي
عنتر بيتعذب بجد
و المشكله الوحيدة
هي ان عبله
محتاجه لعنتر واحد
ما بيحلمش
