حامد عامر
ضميني ياما بين عينيكي فموسم الهجره
سامحيني لو ضرك فلحمي نسبة النترات
كان ودي أطير زيهم وفشلت فالتقليد
كان نفسي انبت حب لكن بلادنا جليد
دمي نشف ..لو سال مايرودليش الروح
وانا راح افيدكوا بايه..!
ضحكتهم السواريه عريانه فوق مع تحت
واناعيني صابها عفاف ..من يومي كنت بخاف
علي بسمتي مالجمع ومن اللي سرقوا السمع
ساعة ماقلبي لغى عن عشقه للساقيه
والسنبله الباقيه متحامي فيها القصب
كلي منكت حطب
وانا بين هنا وهناك..
مشدود كجلد الطبل في فرحهم بيرن
سامر فسامر والمدن راحماش
دقه فدقه والليالي تميل
فاجره وقادره حزموها بشال
شال الموده بنت عمر قتيل
عمري اللي ما حوشت غيره عالورق
وآهي نازل في كعوبهم عرق
لم حسوا بيها فدوشة التطبيل
ماعرفش ليه الغنا يومها مارقصنيش
رغم اني محتاج المهازل لاكتشاف الذات
يمكن عشان انا والغنا متعه
مايجوزش نبقي لبعض لاننا اخوات
يمكن عشان ......يمكن عشان .....
عنيكي يومها دمعت..
سامحيني لو ضرك فلحمي نسبة النترات
