محمد الحمامي
- من ذا الذى لا يؤتمن ؟
* الزمن
عزمنا ع المشاريب و طالبنا دفع التمن
و احنا الضحايا العرايا
ذو الجيوب الخوالى المغرمين بالدفا .
- من ذا الذى يشبه قساوة الجمر ؟
* العمر
عشمنا بعد الصوم على ارضه نلقي التمر
ضرب النخيل بالطوب عمره ما كان غايه
إلايا مش باقي يا الأرض يا مؤسفه .
صاحب .. و بنت .. و علبة سجاير
و مش مهم الزاد ياللى ابتليت بالجوع
سلب الحليب من نهدها الفاير ..
يقدر يحقق .. وحدة الموضوع
يوحد الأوجاع
تصبح وجع واحد
يوحد الأتباع
يبقي الصديق .. واحد
و يقلل الاحتياج من كل شئ بيزيد عن الواحد
و يكفي جوفك و عودك من كل شئ ممنوع .
مكر الزمن مكره و انت البعيد هربان ..
بسم اللى انتشي بالخمر في مدينة الرهبان
عامل حساب الزمن و بتسف الخساير سف
متشققه اقدامك م المشى خلف الصف ..
اخر الطابور .. توهه .. بتشد كل البشر
اخر السفر ..
هتعود أكيد خسران .
يا حنينه يا غربه ..
ع التاركين للدار
يا حنينه يا تربه ..
ع اللى انتشوا الصبار
صبرين و صبر صبرنا لم نولنا
عشرين ربيع و جف محصولنا
و مين يعولنا بحزننا الباين ..
و مين يصونك يا آخرة الأسرار ؟!
الله
رحيم
غفور
الذنب ده .. مغفور
الذنب ده معملتهوش
كنت إتزان الرغبه في مدينة الشهوات
خاننى احتياجى بلانى بالشهوه ..
ضاجعت فيكى يا شوقة المسافات
و زهدت فيكى .. قبل ما أهوى
ما ضاجعتكيش
ما زهدتكيش
المعنى حاكم ع القلم ف ماتستحيش
بنيت لى سور و رصيت الهزايم ..
كنت هايم ..
و كنتى ربحى ف أول الخسارات .
نسل الزمن لحمى و وزعنى ع الصلبان
بسم اللى انتشوا بالخمر في مدينة الرهبان
