محمد سمير مصباح
وادينا بنقول الحياة دي بنت كلب
قاسية بتجرح ف القلوب الطيبة
بتنيمك علي جنبك اللي بيوجعك
وتسيب ف قلبك مشكلاتها المتعبة
ونقول كمان :
الحب كدب حروفه بس اتحرفت
آخر المشاعر غنوتين ف شريط كاسيت
كل الحبايب ماريونت ف ايدين هوا
داء الفراق بيكون ساعات هو الدوا
قولنالنا ميت عدودة بالدمع الرخيص
بنحب ندهن ع الدهان ستين دهان
ونحط ع اللي اتحط حَط .. نحط حَط
ونلف بشكرتون حياتنا تصير ضباب
ونغلف الأرض العادية ..
بطبقة إسمها الأسفلت
..
إحنا اللي وسخنا الحياة
وفسدنا ف الأرض بغباءنا
زي ما قالوا الملايكة ..
لربنا ، يوم ما اتخلقنا !
