أنا بقول الحقيقة
محمد سمير مصباح
أنا بقول الحقيقة ..
صدقوني .. أنا بكذب
كل اللي جاي واقع ..
ومتألف
كل اللي تاه عن ركب متخلف
بس انا تايه ببص لوحدي من قدام ، ومتغلف
بالمعرفة والحب
التمثيلية هي وجود البطل ف الحدث ولا حدوثه له ؟
العبرة مرمية علي اﻷسفلت ؛
-1-
شاعر كبير حط الخلاصة ف عقب سيجارة متولع
ورماه لشاعر صغير .. قال يدوسه له
وقاله فايق معايا ولا لحقت غفلت ؟
أنا كنت واقف ع الهوا ومازلت
ولا عمري رحت لبر أو عزلت
بمسك زمام الحقيقة م السما السابعة
واوهبها كل الخلق من غير ما تتكلف
شوفت الطيابة ؟
_ شفت.
شوفت المحبة ؟
_ غرفت.
شوفت الحقيقة ؟
_ قرفت .
وبدأ يدندن قبح ويأبح
ونط ع الشاعر وقال يدبح
لكنه سابه ف سماه .. ع الريح بيتمرجح
وده فعل شاعر بشاعر
وده فعل خالي المشاعر
والحال كده علي طول .. موروث ومتسلف .
-2-
إيد العجوزة حطب .. ومكرمشة ف الشمس
كان انعكاس الضوء .. طابع حكاية أمس
قفص الطماطم مفعص
مش حمل حتي اللمس
هتبيع بكام الحزينة ؟
مع صوت أنين السرينة
لحكومة بتشيل حاجتها
علشان فيه موكب معدي
لوزير بياخدله صورة
علي صفحة أولي ف جريدة ؛
"حاسس بناس ع الحديدة"
قال جاي يحل المظالم.
بيشوفها قاعدة بتندب
ودموعها نازلة تسرسب
يسألها : مالك يا حاجة ؟
تقوله : عايزة الطماطم.
..... يتبع ....
