ارقصي
أحمد أسامة
ارقصي
الزمي الصمت اللي عشش
رتلي ورد الرضا
حزمي عرضك ماحدش
للشرف هيموت فدا
وارفعي صوت الندا ..
خبطه كاسين
فوق روس خلايق م الشقى
سكرانه طين
متحنطين..
ومحوطين ع المهزلة
متعودين ع المزبله
متكتفين ف المريله...واقفين طابور
على لقمة مسمومة ف سبيلها
اي شيء طاهر يغور
وارقصي ما احنا ف ماخور
واطلبي دعم الخمور
لجل ما الساقيه تدور ع المعصوبين
مش دريانين
المغصوبين ع المعصيه متوضيين
دفعوا العشور للحاشية ولا سبوا دين
يبقى ارقصي ما يهمكيش
ولا تخجليش
واغسلي عارك بنيلك
لو باقيلك منه شربه
العني عبورهم قنالك
واعلني ان النصر ضربة
فتحت ابواب مواربة
للخفافيش اللي شاربة
م اللي سال يوم الاغتصاب
بعد المنصة...بخطوتين
عجب العجاب
اللي عاش مجهول سنين
عملينله تربه
عمركيش شفتي الشهيد...حاسس بغربه؟
اترحمي بقا ع اللي فات
ما الكل مات
الاكي واخده ع المرار ولا بتموتيش
فامتزعليش
خفي الحمول بقا وارقصي
اخلعي عنك تاريخك
والبسي توب الخراب
كفري فينا الخطايا
واستري القلعة بنقاب
لون سواد تلاتين نتيجة
واحنا بالعين الهباب
واحنا شاربينك سراب
فرض انحراف..
ملوه الثواب
حد وعقاب..
ع المخلصين
الخلصانين منك عتاب
واما تقرصنا ضماير الانسحاب
ولعي قشك سجاير
وزعي الهم ف شكاير
ع الحساب..
واجري بينا
واجبرينا نبوس رغيفك
بعد ما يسف التراب
وارمي خيرك للعدا
واستوردي لهرمك جراب
علقيه ف صدرك حجاب
ضد البلاهة والنطاعة
ضد الصناعة والزراعة
والعلوم...ضد السموم
وانسي الهموم يلاارقصي
بس لما تخلصي
افرشي ذلك بساطك
واسجدي
اركعي بطوعك لجوعك واسكتي
وارقصي مافيهاش كسوف
اخضعي لحكم الظروف
هزة المكسورة خوف...مافيهاش حساب
كلمة اللي مالوش سلاح...ملهاش عقاب
وانا حيلتي ايه غير كلمتي
كل اما اشوفك ترقصي
========
