مصريات من عبث الذاكرة
أحمد البوهي
مصريات من عبث الذاكرة
ضى القمر
راسم ملامحِك
فوق خدود الامنيات
والحزن قسِّم دمعتك
والفرح جسِّد ضحكتك
والجرح مات
والصمت دام
خلّىَ الكلام
ينسج حروفه من السكات
خلدينى فى ذكرياتك
واقرى كل الذكريات
واكتبى فى صفحة حياتك
قصة عن شاعر جريح
عاش وكل مشاعره ماتت
تاه وابيات شعره تاهت
كل بيت اصبح ضريح
رجعى ليّا المشاعر
زودينى بنبض شاعر
اسكنينى وسكّنى فيا الآهات
خلدينى فى ذكرياتك
واقرى كل الذكريات
احلمى فيا اللى جاى
واعشقى فيا اللى فات
احضنينى
واعزفى على جرحى لحنك
شيّلينى كل همك
واشركينى فى كل فرحك
خلتينى اعشق بحور العشق فيكى
علمينى ازاى بشعرى اوصفك
وارسم ملامحك
رغم انى يا مصر عاشقك
بس عمرى فى حضن قلبك
يتحسب لحظات
آهاااااااات
خلدينى فى ذكرياتك
واقرى كل الذكريات
