طاب طمنينى إزى احوالها ..!!
سعيد شكري
طاب طمنينى إزى احوالها ..!!
طاب كلميها وإسألى عنها
وقوليلها حالتى بعدها حالة
وطمنينى إزى احوالها
وابقى ابعتيلى الرد ف رسالة ..!!
مكسوف أقولك انى مش قادر
أسأل عليها بعد هجرانها
ونصبت قلبى للعزا شادر
ودفنت فيه الحب علشانها ..!!
معلش انا تقلت عليكى من عشمى
بس بصراحة مافيش . مين غيرك اسألها ؟!
وفرطت عقد الود من غشمى
وقفت عليها الدنيا وانقلب حالها ..!!
وماعدش ليا بعدها غيرك
اركن عليه ضهرى وانا مآمن
ماهو إنتى هى وهى مين غيرك
وعنيكى شاهدة وقلبك الضامن ..!!
لما اتعاهدنا وقولتى راح توفى
وخطفتى روحى من سنين ف الضل
ورميتى راسك يومها فوق كتفى
نزلت دموعك فوق قميصى إتبل ..!!
وغسلتى روحى من هموم ياما
ونسيتينى حتى اعز الناس
بس النهاردة بقيت ف دوامة
كانت حكاية وانتهت وخلاص ..!!
بس بأمانة تطمنى قلبى
مشغول عليكى ومهما كان جرحك
قلبى المسامح ياما بيخبى
وماهانش عيشك يوم ولا ملحك ..!!
