عارفة
هشام صبح
عارفة
أكتر حاجة تخوف فى البعد
انى ملمحش الشوق الساكن فى عينيكى
لما تقولى بحبك
ماهو ايه بيوجع
اكتر من انى أسمع صوتك
و ﻻ أطولكيش
لو كنت أعرف ان البعد بيعمل كده و اكتر
كنت استنيت
و مغبتش عنك من غير ما آخد صورة بتجمعنا
من غير معنى
غير بس تفكرنى بلحظة ما مسكت ايديكى لاول مرة
او اول مرة همستلى شفايفك على صورة طفل
و قالت
اصلى بحب اﻻطفال
مانا برضه بموت فيهم
بس دى كانت اول مرة اتمناها بجد
أشوف شبهك بينادى عليا
و يقول بابا
لو كنت اعرف ان البعد بيعمل كده و اكتر
كنت اتحصنت بصورتك جنبى
و اترحل فى اليوم ميت رحلة
لجل ارجعلك دمعة فى عينى
و بكل الشوق الحيران جوايا أهمسلك
متوحشنيش
