محمد الحمامي
و نقول
ــــــ
أخر مرة قولت بحبك
كان مزروع فـ عنيكي جنينة
كنتي حزينة
لما غصبت عليكي تسامحي
أخر مرة قولت بحبك
سهام الكون في عنيكي تدوب
وأنا مغلوب
رافع إيدي مِسَلْم رُمحِي
أخر مرة قولت بحبك
كنت بقول
حبيبتي الشاطرة
حتي العُمر أتلون خُضْرَة
ملامحك حاضرة جوا ملامحي
أخر مرة قولت بحبك
فـ لحظة ضحكتي
قولت لـ نفسي
"إهدي يا نفسي"
حتي الشوق حير جسمي
قالوا زمان قمرك أبيض
قولت في عيني بيكون قَمحِي
أخر مرة قولت بحبك
شديت سيفي يكون مجدافي
قولت معايا أوعي تخافي
حتي قُليبك بيكون كافي
لو مهزوم وملقاش رِبحِي
أخر مرة قولت بحبك
سكت للحظة
قولت أدون فيكي ملاحظة
شوفتك زي نسايم دافية "هَزِت روحي"
لما زماني في مرة دبحني
أخر مرة قولت بحبك
قولت أحارب وأفوتلك رُمحِي
يمكن مرة أبقي قتيلك
فـ يسود ليلك
تشتاق عينك
فـ تعود روحي تلقي جوارحِي
