عمرو شاهين
المدخنين يعرفوا..
لسعة الدخان لما صهد أول نفس بيحجب الرؤية.
ويعرفوا طعم الكحة بعض نوبة ضحك
ويعرفوا ريحة الفلاتر اللي بيحرقها السهو والنسيان.
ومايعرفوش لسعه عيونك وقت الفراق
ولا يعرفوا طعم دموعك والمسافة بينا بتتحسب بالوقت
ولا يعرفوا ريحة أهاتك لما أشمها في كل اتنين ماشين سوا
مش مهم الفعل بكا أو ضحك
أو رد فعل الرصيف على إيقاع خطوته المنتظمه
وهي بخطوته المحبة للحياة
أو العكس
المهم إن كل دول شافوني ببكي بالكلام واتبسموا
كلهم في لحظة واحدة
صقفوا للقرد أبو صديري كثيف الشعر
وهو بيفرش ذكرياته جمر
ويقلع كسوفه
ويخطي حافي.
انتى بس - بعد إنتهاء العرض - اللى قولتيلي سلامتك.
