أنا وانتى
أحمد البوهي
دى آخر مرة هكتبلك
ودى نهاية قصايدنا
انا وانتى زماااان كنّا
ودلوقتى بنستمتع بغربتنا
بعيد عن بعض
وبـلمح شوقك المكبوت
وأحلام اللُقا والبُعد
بقول أنسى
اللاقى الذكرى بتحاصر سكون الليل
واقول أنسى
اللاقى القلب بيعاند
ورافض لو يكون صامد
بكون صامت .... بلاقى ان الحنين بيثور
ولو يفضل ما بينا السور
هنستمتع وهنحاول نعاند بعض
***
انا وانتى برغم البعد والفُرقه
بنتحجج بأى كلام
يعيد لحظة لُقا تايهه
وبتحاوطينى بدروبك
فاغيب عنك
لان دروبك التايهه
سبيلى للهروب منك
دى آخر مرة هتذكر
وآخر مرة هكتبلك
أنا وانتى برغم البُعد والفُرقة
شِباك الغيرة حاوطتنا
ويسألنا الحنين نهرب
نقول بالكدب مش فارقه
ولحظة صبر خلتنا
نجاوب صمتنا بالصمت
وبَعد البعُد
أنا مابغيرش من غيرى ... اكيد بكدب
اكيد وانتى اكيد لسّاكى بتغيرى
***
انا وانتى برغم البُعد والفُرقة
ساعات بنحن ونصالح
ثوانى الذكريات والتوه
أنا وانتى فى وهم الممكنات بنتوه
بيحدفنا الامل عالخوف
ويجرفنا الحنين للعند
وحيرة صمتنا فاقت حدودها بجد
يا نرجع تانى للذكرى يانمحيها
ونستحمل
ونستكمل طريق البُعد
لا دا ممكن ولا ممكن هنبقى لبعض
