عيني فـ عينك
هيثم نور
طول ما فيكي مد إيد
بالسؤال أو من حديد
طول ما فيكي بطون جعانه
تشتهي.. مش لقمه لأ
ضحكه بس في كل عيد
........................
طول ما فيكي قصور بتعلى
فوق كتاف ارواح بتعلى
طول ما فيكي الكدب أعلى
والحقيقه سراب بعيد
.......................
طول ما فيكي الهمه نايمه
في النصاحه بس قايمه
والنصاحه يا ريتها دايمه
أو في شيء فعلا مفيد
........................
طول ما فيكي الوقت ضايع
نصه رايح ... نصه راجع
واللي بينهم وقت مايع
مش بيحصل فيه جديد
........................
طول ما فيكي انا مش سامعني
طول ما فيكي انا مش عارفني
طول ما فيكي انا تهت مني
طول ما فيكي انا مش انا
........................
طول ما فيكي الخوف مسيطر
على اللي جاي ومن المقدر
طول ما فيكي الخوف بيكبر
لو في يوم الرزق اّخر
........................
طول ما فيكي مكان ما ندفن
ناس بترحل .. ناس بتدفن
نفسها .. ومكان ما تسكن
حلمها وياها .. تدفن
......................
طول ما فيكي كبيرنا سيدنا
واللي تحتينا عبيدنا
طول ما فيكي اللي يفيدنا
نهمله ونمسح بيه ايدنا
......................
طول ما فيكي الدقن طالت
يبقى شيخنا وعيشته طابت
طول ما فيكي الشعر سافر
تبقى واطيه وبنت كافر
......................
طول ما فيكي اللبس شيك
يبقى باشا ما له شريك
واللي ستره بس هدمه
يبقى صايع وابن هرمه
......................
طول ما فيكي الناس مظاهر
تحترم بس اللي ظاهر
واللي خافي قلب طاهر
من وراه ايه نستفيد ؟
........................
طول ما فيكي اللي يصاحبك
عاجبه حاجه عشانها صاحبك
يوم ما يجي يا خدها منك
تاني يوم ما يكونش صاحبك
