فوق السرير
هشام صبح
(اهداء لكل من تخاذل فى قول كلمة الحق عند السلطان الجائر)
قالو أخرج قلتى لا
شديتينى
ضميتينى
لسه دمعك فوق كتافى بينادينى
ويناجينى
بيسلسل الحلم فى وريدى
كل ماأمشى خطوة واحدة
أرجع أزحف خطوتين
لسريرى أعود وأنام
فى الدفا ووهم الأمان
_"طلقوا الكلاب."
قلتى بينا ألف باب
مش هييجو يكسروه
_"كممو صوت الشجاع."
قلتى أهو,رجعو خاوفو
رجعو تانى محتارين
خليك هنا
اعمل بطل
اعمل عمل
انسج لنفسك حلمى أنا
هتكون شاويش
هتكون غفير
هتكون مناضل جنبى أنا
متروحلهمش
صدقتك انتى ونمت انا
ونزلت واقف وسط غيرى كتير ألوف
احنا الأشاوس
احنا الجهابذ
بنفتش احنا وننتظر
نعمل رجال
أبطال ورق
واقف بسنجة بفتش البوكس الخسيس
بحمى بنفسى بيتى من أعداء الوطن
ناصب كمين
ناصب مسارح مهزلة
متدلدلة
شراشيب هدومك م السرير
وف قلب ليل
أرجع فى حضنك أرتمى\وأحس نفسى بقيت بطل
عنتر زمانه صبحت أنا
صفارة واحدة نرتجف
أغطى وشى وأغمى عين
وأسمع كلام
أفتح عنيا وأبص أشوف
مشوفش غير أسود متربصين
راجل بعيلته كلها كان وسطهم
راجع وحيد
راجع سعيد
بيقول هتفت هناك كتير
أنا منكم
وأنتم أنا
عايزينكم بكرة تخرجو
عايزينكم بكرة جنبنا
ايدكو ف ايديا نهتف نقول
عايزين بصوتكم يوصل حلمنا
ولبكرة نرسم خطونا
ايدكو فى ايديا يالا قوم
سديت ودانى قفلت عقلى ورحتله
وابصله من تحت فوق
وأوقفه
وبنفس صيغة مرة زمان سمعتها
افتح هنا ,وكمان هنا
نزل ولادك كلهم,أطفال كبار ميهمنيش
الشعب انا
حامى حمى أرض الوطن
واقف بدافع عنى انا
ماانتاش انا
ان راح كمان ايه يهمنى؟
ماأنا لسه بشرب اللبن
وأرضع حنانها كل ليل
قاعد بناضل كل يوم
لسايا باكل فى الرغيف مبينتهيش
وأشرب سجايرى وأحط ريحة مفحفحة
وهدومى أهى
تشهد عليا كل صبح بتتغسل
من بقايا نضال طويل
فوق السرير
