- بنحب نلعب مخاطرة
1
بنحدف الطوبة
قاصدينها جنب الراس
حافظ مقاسها الكفّ
2
بنعدّى بالعجلة
من وسط ميكروباصات
من الناموسة أخفّ
3
بننط م الأتوبيس
قبل اما يجى يقف
4
بنمشى ويا الهوى
مع بعض ع الكورنيش
لجل اما شوقنا يجفّ
5
بندور بخُبث الروح ..
على بعضنا و نلفّ
ليه علمتنا المواقف ..
اننا نغلّــط ؟
و اللى يكون أقوى ..
هو اللى يتسلّــط ؟
- بنحب نلعب مخاطرة
و قبل اما نتعوّر
خوفنا بيتصرّفّ
1
بنحدف الطوبة
قاصدينها جنب الراس
حافظ مقاسها الكفّ
و نوطى لو تتحدف
من جنب راسنا احنا
2
بنعدّى بالعجلة
من وسط ميكروباصات
من الناموسة أخفّ
وقبل اما نخبط ..
بخوف ..
بنرمى العجلة و بنجرى
اقل لجراحنا
3
بننط م الأتوبيس
قبل اما يجى يقف
و نرُدّ لو سَرَّع
فجأة ..
و يكبحــنا
4
بنمشى ويا الهوى
مع بعض ع الكورنيش
لجل اما شوقنا يجفّ
و نسيب ايدين الشوق
على ناصية التقاليد
قبل اما تلمحنا
5
بندور بخبث الروح ..
على بعضنا و نلفّ
ليه علمتنا المواقف ..
اننا نغلّــط ؟
و اللى يكون أقوى ..
هو اللى يتسلّــط ؟
و نخاف من الناس السليطة
..
أرواحنا يا عبيطة
الدنيا بتزاولِك
المسألة بسيطة
أيام بتتداولِك
و مشاهد الـ replay
خلت ورقها يشفّ
..
بندور بخبث الروح
على " نفسنا " و نلفّ
و احنا بنا أدرى
..
بنحب نلعب مخاطرة
و قبل اما نتعوّر
بنعوّر الفكرة
و نقولها : " معلش ..
يا روح ما بعدك روح "
و نحس بخيانة
لكن اثرها يروح
مع فرحة المكسب
_ و دا باعتبار ان النجاة مكسب _
و نكرر الكرّة
و أملنا لو نغلِب
مرة ..
بدون ما نخون ..
الفكرة و الملّة
.
.
يااااه
الدنيا دى مملّة
..
بقولك ايه !
تعالى نلعب مخاطرة
و خد بس حبة خوف
وماتخافش
قبل اما نتعوّر
الخوف هينقذنا
وتنجينا الفطرة
تعالى نلعب مخاطرة
