يا بلد فيكي الحمار _ بدِيلِينْ _
مرة بيعشق ف اليمين
مرة يِوَجِهْ لليسار
والحمار ما بقاش بيتمنَى اتجاه
كل اللي عايزه
يبقَى دايماً في انتصار
أو في اختصار
مش مهم الشِيلَة ايه
المهم السعر كام
***
وطالَمَا إن البردعة قد المقاس وحنَيِّنَة
والحِمل مهما يكون تقِيل
بتكون طريقُهْ هيِّنَة
ويشِيلُوا عنه في الطريق
أصبح لهم خادم صديق
ما بقاش يفكر غير في نفسه أو فَصِيلْتُه
أي واحد لِيه دِيلِينْ
يبقى ف زِرِيبْتُه
أحلَى أكل ومَرْمَغَة وسط النعيم
وعيشة حلوة ونغْنَغة
ونظام جديد زي القديم
***
يا بلد برة الزريبة نَهَقُوا
وإن غيَّروا شكل البَرَادِعْ
اوعوا لحظة تصدقوا
ليهم دِيلِينْ
وإن ساعدوا مرة المحتاجين
ارفع إيدِيك واعمل دِيلِينْ
وإن ضحكوا مرة ف يوم عليك
أو لِبسُوا لبس الطيبين
ارفع إيدِيك واعمل دِيلِينِ
الخوف ما عَادْشِي ينفعك
من خاف نِدِمْ
ايه راح يِهِزْ الخوف في قلب الميِّتِين ؟!
قبل أما تخرج من بِيبان السجن
حاول تِخْتِلِق فك الحصار
ايه راح يفيد الصبر
ما لَمْ تَسْتَطِعْ لِيه انتظار
قول لِّلِي مسؤول ع الزرِيبَة
لِيه قتلت الحلم فينا بِغَيْر حق
ايه راح يكون رد الإله بعد الغرق
اوعاك ف مرة تنخدع
ارفع إيدِيك واعمل دِيلِينْ
واصرخ وقول
انتو ليكم دِينَكُمْ
وأنا ليَّ دين
