أنا!!!
أنا طلعة واحد متمرمط
أنا غايب لأ لأ مش حاضر
أنا صفحة ومنسية تماماً
أنا كلمة خلعت معناها
أنا وردة ودبلت ورقتها
بتدور علي مين روَّاها
أنا نبضة والقلب فايتها
وتركها جوة الشريان
أنا حسرة وزمنها نسيها
أنا كلمة كترت معانيها
في العقل بتسكن أركان
أنا تايه في البحر لوحدي
والبوصلة سرقها الربان
أنا غيمة وف وسط سحابة
أنا أرنب وف وسط ديابة
أنا قفل ف إيد السجان
أنا حابس نفسي في زنزانتي
أنا حافظ شرفي وأمانتي
أنا عايش رغم الأحزان
ليه خطوة بخطوة بتتبعني؟
ليه زمن الرخص قوام باعني؟
والدنيا الواسعة ما بتساعني
ليه تسرق قوتي وتفجعني؟
أنا مش هسكت زي زمان.
سامح لطف الله
