مش زى حضن عابر
لو عوزتى فى لحظه تحضنينى..
مش شرط تقرّبى
كفايه تغمضى عينيكى..
وبلاش تعصريها قوى
ممكن ف لحظة نزف أموت
القلوب بتحضن بعضها..
والإيدين بتشاور
من بعيد للسلام.
حضن القلوب فى الوجع
مش شهوه
مجرد..
حزن عابر لمّهم
خارج حدود الزمن .
المكان ..
هامش
والحياه ..
بتفوت ع القلب اللى خايف م اللقا.
مين فات على قلبى بالدهشه
الحزن زى الحضن
والفرح خيط عنكبوت
إزاى هتقدر بضعفها..
تدفينى؟
قلبى والبكا حالات لقا
والفرح..
خلفية فراق
الحضن..
هو البدايه المنطقيه
لأى حالة شوق لصدق
مين اللى قال:..
إن البعاد بيقلل التوهه
وان اللقا حالة حصار؟!
مش هابرر حضن الوجع بالقرب
المنطقى إن القلوب بتحضن بعضها
فى البعد
قبل القرب.
مش شبه الحواديت
