وإيه يعني
تبان غربة
تشد الخطوة من روحك
تزق العمر ورا ضهرك
تعده
بعدد نوحك
وتترك ضحكة منسية
علي باب إللي حبيتها
علشان اليد مغلولة
داريتها كتير وخبيتها
وتبقي غريب ف تغريبة
وكاسرك جوا تنهيدة
وتدعي الرب علي حالك
تلاقي الخطوة تسديدة
تفارق ناس
تقابل ناس
وتلقي الوشوش هي
وتضحك حيرة
وتضايق
فاكرين السفر غية
وهي بس إللي وحشاك
ونولها وحده خلاك
تشد وتعزم النية
يلف العمر في روليت
والشعر فيك يزيد غربة
بتصبر مهما حنيت
فارس
والعمر كان حاربة
وترجع م السنين دايب
شايل أوجاع ف الشنطة
بتضحك والهوي شايب
مع أول دوسة ف محطة
تلاقي الناس مش هي
وحبيبة تاهت منسية
عانت كتير من الفرقة
يا صاحبي
من الغريب فينا
دا جوا وبرا مش فارقة !
