**** بحبك طيبة بتونس ****
***********************
خطاوي السكة مفرودة بتتمخطر
وعين الفجر بتصبح بعود اخضر
ووشك ع الندى طارح عودين ياسمين
بنوره القلب يتوضاله ويكبَّر
صباحك حنة ف كفوفي بتتعطر
وجنة حضن بيخلي البراح يسكر
يلملم شوقي ف ضلوعي ويندهلي
الاقي الثانية ف حدودك سنين سكر
يا قلب الليل وضلاية وضحكاية
وقنديل ضي بينورلي دنيايا
بحبك طيبة بتونس سنين عمري
يهون الصعب طول ما انت هنا معايا
مركب هوايا اتغربت بين الف مينا
وشراعي دابت م السواقي الدايرة بينا
ولمحت شطك مرسى للروح والضلوع
سلمت انا وقلبي لهواكي وابتدينا
