حسين صالح خلف الله
يالييييييل
..
الصُّبحِ يطلع
يملَى الوشوش كَرَاميش
ويقسى علينا
ويعمل للربابة فيش
ويغضب قوى
لمَّا نقول ياليل
ياصبح غنِّى معانا
ولّا ماتغنّيش
يالييييل
دا الليل ولى
والعاشقين دراويش
فردوا قلوبهم مدد
طالوا السما
بلا ريش
لمَّا المزاد اتنصب
باعو ا الحرير والخيش
حضنوا الجراح بالرّضَى
وقالوا الاّهات بقشيش
أحنا اللى وجع الربابة
موصوف لأوجاعنا
وغيره حضن الليل
ولاحضن بيساعنا
ولو الكلام عالجرح
ياعم جرّحنا
خلّى الربابة فى أنّة
تقول الصباح مايجيش
...
