عماد عامر
مستنيها ( من ديوان عجلتى ال 26 )
----------------------------------------------------
فرصه تخرج
بره دماغك مرة
تشوف ايه اللي يبان
منك للناس
متفاجيء؟
طبعا
مانتا اللي بتاخد بالنيات
و تسلم ع الناس و مطاطي
راسك ف الارض
شكلك مش عارف ايه يفرق
جلد عن جلد
ايه اللي بيعمل
صوت الاشكال
ايه اللي يخليك
بتحب الشعر اللي بيتقال
عن المكتوب
و السبب المزمن
لوقوفك وحدك ف البرد
و استمتاعك ف مصادرة
حق الاخر ف الاكتشاف
شخصية المدرس الي جواك
بتخنق الناس
اللي بتحبك . . .
قبل الي بيكرهوك
بتخليك دايما
واقف ع السبورة
متذنب بالاحلام
اللي بتسقط منك ع الارض
جربت تحب على طريقتك
رسبت روحك
جربت تحب بطريقتهم
سقطو جواك
الوش الطيب اللي بتتخيل انه بتاعك
لو زيي انت بتبص عليه
حتلاقي موظف
عينه بتهرب مالبص
على كشوف القبض
و يتابع لوحه
ان العدل اساس الملك
وهو بيحسس
على جيبة الخالى من الموازين
ميزان العدل اللي ف روحك
جواك
بس كاتب
عليه استعمال شخصي
زي الفرشه القديمة
اللي بتستمتع
بتسريح شعرك بيها
و الغنوة الي شايفها
منتهى الرومانسيه
و لما بتسمعها لحد
بتشوف ورا وشه امتعاض
طيب
حوريك وشك مرة واحده
و اوعدني انك
ما تشهقش بعينك
لما تشوفه
انا مش حمل اذيه
كشف الاخر
و ما بحبش العب دورك
ف التدريس لعزازك
شايف
الكرمشه اللي ع القورة دي
مانتاش عامل حسابها
و لا كنت شايفها
و انت بتسرح الامك ف المرايه
ايوة دي بتاعتك
زي الشعر الابيض
اللي كان نفسك و انت صغير
يطلعلك منه كتير
و اما حتشوفه هتزوم
و تقول عجزت
بص ع الجرح الغاير
تحت العين
ايوة
لسه باين
حضرتك مفكر انه راح
هي جراح الروح بتروح
بس عادي
ممكن تعمل عمليه و يطير
ولا
انت يابني
ساكت ليه
يا عم
انت مت؟؟؟؟
