عماد عامر
الكائنات الفضائيه
- اصدقائك القريبين -
اللى بيهبطوا عليك قليل جدا
لكن
دايما
متنتورين
فوق كنب روحك
و عاملين دوشه
بتخليك
مش بتركز
ف وجه الشبه
ما بين
انكماش جيبك
و اللحمه المستورده ع النار
و السبب الحقيقى
انك كل ما تفتكر مديرك
تفتكر
كل الكائنات الشريره
اللى اترسمت جواك
و ليه دايما
مٌصٍر
تقابل الناس
بضحكه سكان كوكب المريخ
انت
ما بتنتميش للارض
معروفه دى
بس الغريب
و المدهش
اللى مش حتصدقه
انك
كوكب
ضال
اخترق
كل مجالات الحياه
و عاش
ف البقعه الوحيده
للزومبى
متخفى ف صوره
بلياتشو عجوز
خايف
يطلقوا عليك اشعه الضحك
و يتفاجئوا بيك
و انت
فعليا
بتضحك من قلبك
