يـارب
كُل اللي كان ف جيوبي 10 جنيه
و قابلتُه قاعد نُص مَيِّت ع الرصيف
واقفالُه بالمرصاد غيبوبِة السُكـر
طَلَّعتلُه الجنيهـات
و مشيت لِحَد البيـت
يـارب
شُفت السما
بتحدِف على المخاليق دمـوع
و عياطها كان واصل لطوب الأرض
و قابِلتُه ع الكورنيش كفيف
واقف بيستنجد بحَد م العُشَّاق
و بيبتهل تخبيط عَصَايتُه
بالعشم للسواقين
علشان يعدي للرصيف
حطيت " نيفين " ف بلوك فاضي
و كنت لُه نجده و ونس
يـارب عارف إن انا مجرم أوي
لكِني بني آدم
خَلِّي المـلايكه تشقُط الدعوات بقى
و تزِف لي مدَدَك بِشاره
