أنا لسه برضو بسألك | محمد الحمامي

أنا لسه برضو بسألك
إزاي أكون ,
وإزاي تكوني

وإزاي ملامحك
تشبه لكوني

وإزاي عيوني تشبه كواكب
وإزاي ضلوعي تكون مراكب
تغزلك في نفس نولي
وإزاي تكوني نصي الجميل
وإزاي أميل لبحور ظنوني
وإزاي تكوني بشر
في شكل نوري

أنا لسه برضو بسألك
إزاي
عطر النسيم ساعة عصاري يشبهك
حتي النغم في جوف الليالي يشبهك

وأنا واد فلاتي
عشقي ليلاتي أندهك

فإزاي تكوني ف بحور الهوي شطي
وإزاي يثبت قلبي وإنتي بتخطي
وإزاي ألوم القلم لو يرسمك خطي

ضحك الكلام
ملام
وإللي لاموا قبلي يامة
قالوا صياد
والصيدة دايما يمامة

فإزاي تكوني ملهمة لنبع القصيد
وإزاي أوجه طلقتي وإزاي أصيد
وإزاي أكتبك سطرين قوالة
ولا تباني في نفس لوني

فإزاي تكوني !

إعلان