مشهد متكرر تاني
( اهرب . . . . . )
فاكر مسكة ايد ابوك ليك و انت
بتعدي الشارع؟؟
قد ايه
كانت زي ما تمسك عصفور بردان
و تحاول تدفيه بالبشري فيمل
طب فاكر لما كنت تشوف الفيلم
اللي حافظه
و تبكي ع البطل المغلوب
و تخبي دموعك
و تدعك عينك
قال ايه انطرفت؟؟
ولا لما حد يقول عليك حاجه حلوة
و تصعب عليك نفسك اوي
فتمشي بعيد
و تشوف كل الناس
اللي شايفه قلبك المفتوح ع البحري
ف تبص ف الارض
و تلعب لعبه بلاط الرصيف
احمر ادوس اصفر لأ؟
دلوقت جه دورك
انك
تتفرج ع الكائنات البشريه
و تلعب لعبه فيلسوف فارسي
و تمارس ع الناس اليوجا
انت دلوقتي
محمل بكل التجارب
اللي تمكنك
من انك تعرف ايه اللي قدامك
بيفكر فيه
و بحكم السن
و فارق الخبره
ما توطيش ع الورده اللي رمتها البنت
ع الارض قدام الواد
خليه هو
اللي يشيل الجرح لوحده
و ما تواسيش
الخايف من بنت ما جاتش
الجرح الكبير اللي ف صدرك
علمك
ما تضغطش على حد
عشان يخف الالم
لان الالم ده
هو اللي حيديله القوة قدام
و بلاش ارجوك
تلعب دور الفاهم اوي
قدام حد بيعمل بيرسم عليك
خليه يستمتع بدور الفاهم الاوحد
و اديله حبه سوكسيه
و اعمل مش فاهم خالص
حقولك على كل حاجه
و كل المطلوب منك
بس ارجوك
ارجوك
بطل عياط
