عماد عامر
جـــــــــــــــــــــــــــــوع
========
الجوع
بالحجم العائلي
مكلبش
بضوافره ف الطبليه
و الاطباق
اللي شبعت تغميس
بتمضي
حضور و انصراف
ف التلت اوقات
فطار
عنين بتبحلق ف الاطباق
و ايدين خجلانه
تعدّي سقف الجوع
و الشاي
الراعي الرسمي
و دخانه
ف دماغ الجعانين
بيحل كل الكلمات المتقاطعه
الايدين
عماله تتغير
تزيد مره
تقل مره
و الاطباق
بتقاوم
زحف النمل
من الامعاء
لحد السنّه
الغدا جاهز
الاطباق
استعدت بشده
و مراسم تتويج ادين الحاجه
بتشارف ع الانتهاء
لغة التعامل
بتزيد همجيه
لما يكون ف الاطباق
لحمه
او فراخ
لكن الصمود الرهيب
هو الدوا المؤقت
العشا
الايدين الكسلانه دلوقت
بتحل مشكلات المواجهة
و القنابل
المسيله للجوع
بتخف مفعولها
المعركه
بدات تنحسر
عن الزتونات التلاته
اللي هربو م المذبحه
و حتة الجبنه الصامده
لكن للاسف
ما قدرناش نلحق البيض
او الفول
او المربه
المشكله
عند الاطباق
مش ف الحرب
المشكله انها حتبات
مش مغسوله
لكن
لو حد بص ف الاطباق دي بالليل
سبحان الله
مش حيلاقيها
بتعيط
