أحمد فخري الأسواني
مولود ف زنزانه
جواها زنزانه
متجسمه ع القد
في حياتي معرفتش
غير التعب والكد
عصفور ولساني
مقصوص وكان ع القد
عايش علي حكمه
قالها زمان الجد
أياك توطي الراس
لو مرة للغربان
ولو تموت م الجوع
الفقر للجدعان
لكن الغراب بوط
بجناحه هد العش
والدود اكل قمحي
ما سابلي الا قش
ياريت يكمل عش
ولو شوفت يوم
دبور اجري ومنه اخاف
لحد ما الكيل فاض
والهم سال علي الارض
قولت بكفاية
وخلاص مبدهاش
هو اللي عاش جوه القفص
يبقى اسمه عاش
فردت جناحاتي
المغروزين ف الطين
نشف عروقها الفقر
وروحت لأخواتي
سمعوا الادان جايين
من كل شق وفج
طلعنا صوت واحد
يسقط غراب البين
سمعونا اتجنوا
مين اطلق المساجين
ميعرفوش انا مين
انا ابن صمت الليل
عطشان غنا ومواويل
هجموا بخيولهم
صادتنا مناقرهم
وكلنا وافقين
لو الصخور دابت
ولا السنين فاتت
قدامنا راكبه الخيل
وفرشنا دبابه
ولا الرصيف ناشف
ولا فرشنا القبر عيش سن مع قراقيش
وغدانا كان المش
ابدا ما اعود العش
غير والغراب مدفون
تاني في سردابه
وساعتها اعود العش
و نص الجناح ده نار و نص الجناح ده نور
والعش كان منحوس
اول ما اسد الشق
يظهر يبان تاني
واعود انا تاني محبوس
ف زنزانه جواها زنزانه
