عماد عامر
هروب اخر الحواريين
( مش من لوحة العشا الاخير )
المائده
باينه ف المرايه
بكل التفاصيل
اليسوع و الحواريين
و كلهم
مستمتعين بالعشا
و الطيور اللي
ما داقوش زيها
و ف المشهد باين
حواري وحيد
وشه ممتقع
و بيصرخ بعلو صوته
و حد عامل ميوت على صوته
و هو بيصرخ ف يسوع
انه ما يشربش
الكاس المسمومه
و المشهد بينتهي
بيسوع
بيسقط ع الارض
و الحواريين ملمومين حواليه
( م الناحيه التانيه م المرايه )
المائده هي هي
و عليها
بوم و غربان
و طيور جارحه
نص حيه
و الحواري اللي كان بيصرخ ف المشهد
لابس وش يهوذا
و بيقدم
كاس السم ليسوع
بالابتسامه الحنينه
و بينتهي المشهد بيسوع
بيترمي ع الارض
و كل الحواريين
رايحين ف الضحك
