يا ريتنا فضلنا زي زمان
مصطفي البسيوني
يا ريتنا فضلنا زي زمان
عيال فرحانه بعيديه
و نكتة كل ليل بيفوت
و حلم طاقية الإخفا
و كورة يدوب بنُص جنيه
و مين هيقسّم الملعب
يا ريتنا فضلنا زي زمان
عيال م الضحك ما بتتعب
عيال شياطين
و ده رأي الكبار فينا
نصيد عصافير
نجيب سنانير
و طُعم و جري ع الترعة
ما كانش ف همنا نصطاد
و كان الهم نتجمَّع
يا ريتنا فضلنا زي زمان
عيال لا تضر و لا تنفع
شوارعنا
شوارع شاش
تداوي جراحنا و تداري
و ميت شبَّاك
بيستنى النهار يمشي
و لمبة جاز
و واجب لسه ما كملشي
و خوف من بكره يتأخر
و حلم معانا كان تمليك
و عمره ف مرة ما اتأجر
يا ريتنا فضلنا زي زمان
عيال و الحلم كان أكبر .!
