1
في البدء
كان القمر ساكب
علي بحرك خمر
في البدء
كانت عيني
كما الدرويش
زاهد كل صنوف الحلي
لكنها شافت سفر روحك
لفوق جدا ..
وقت اما كان
الستر الوحيد لعودك
رموش عينك..
شافت سبيل الجنه
علي نهدك ..
والبحر هادي بيخضعلك
مافيش حركة
غير لموج شعرك
جريت للشط
اسرق حصون قلبك
..فزاد شوقي
2
عينك العطشانة ليا
بتقتلني
بنظرتها
وتعطش لكل صنوف الخمر
وتقتلني ..
برغبتها
ماتشبعشي
فتوصل قذارتها لحد القتل من تاني
وتقتلني
وتفضل انت
عابد لغريزتك
تخوني بتسليمك
فتقتلني ..
وأحاول أمد النص
يساع بوحي
وأطلع الكلام م الجوف
لايقتلني ..
3
انا فارس من الماضي
ملك كلماتي ولساني
وكان ليا ف قلوب البشر
200فدان
وكان ليا في بحر الشعر
مراكب صيد
غرقت خلاص
من السرحان
من التركيز
في دوامة
رسوم الشمس علي جسمك
-بحورك ثابته
ثبوت الموت
فراغ قاتل
لا كائن حي
ولا مركب-
نسيت الشعر
نسيت العوم
نسيت العمر في احضانك
أنا مولود علي ايدك
4
لسة زي ما إنت
بيفيض الحنين من عنيك
وأنا لسة عند قولي
"أنا ليا في بحر حنينك مراكب صيد لكن ما املكش البحر كله"
اللي اختلف
فيض السكات علي لسانك
وكسوفك من قول أحا ع الملأ
لا أنا اتغيرت
ولا إنت قادر تكسر خوف المعاب
مستكتر علي نفسك حبة وجع
بيكافئ نسبة شبع شهوتك م النظر
علي قد ما بيفرق معايا
حضنك بدون خجل
وعلي قد مابيفرق معايا
الامان
بيفرق معايا الشعر والصعاليك
وبرده الرصيف قادر يحضني
بدون نظرتك
بدون خوف من شهوتك
يقدر هتاف
يملاني باحضان السما
5
أنا ميت بعيد عنك
ارجعيلي ..
احضنيلي ..
وجعي اللي فات علي روحي
وامزجيلي ..
موتي بضحكتك
عشان احيا
6
ماكنتش في الأساس زاهد
لكن هربت الحياة منك
وشهوتك في الحياة
جسمي ..
وأنا مش عاوزة أموت في عنيك ..
وأقتل ضحكتي بسجنك . .
ومش هرجع
أخلي لياليا كما البن المحرق
فتنحت في ضلوعي .
