فى المكان دا من سنة
زى الكابوس كانت هنا
كنت قاعد ويّا واحدة
قلبها مليون ملاك
قالت الرّعشة ف لسنها
خد فى إيدك دبلتك
سكتي مش سكتك...
قالت الدمعة ف عنيها
مش عشان الدبله فالصو
لاء عشان دي حبتك ...
قمت عامل نفسى دبلة
كنت زي حبيبة حبلة
رامية روحها ونفسها
كنت كاسر قلبي ؟!
آيوة!
أصلى كنت بحبها...
حتي آخر نقطة فضلت م الكرامة
كل كلمات الملاطفة والملامة
كل حاجة بتبعدك كان مفترض
ترجعك ...
كنت شايفها ف عينيكي يا حبيبتي
بتوجعك ...
كنت جو الكادر يعني
كنت مش شايف حقيقي
يعني اية عاوزة تسيبني؟!
أو طريقها غير طريقي؟!
واما جت سيرتي ف كلامها
قلبها وف لحظة خانها
قالت الكلام دا كله
فى النهاية .. "باي حبيبي"
بعد كام شهر إتقابلنا
هي كانت .. هي .. هي
آية صارخة في الجمال
كنت بره الكادر شايف
فاكتشفت ف لحظة واحدة
رد يخرس ميت سؤال
كنت قاعد ويّا واحدة
حبها كان ليَّ صادق
بس شُغلتها شمال ...
