بياخدنى الحنين
إبنة الدقهلية نصفها كفراوى ونطمع فى هذا النصف ونتشرف به
بياخدنى الحنين يامًه
يعود بيا الزمن تانى
واعود طفلة على صدرك
أنام و اصحى على صوتك
ولا أسمعش غيرهمسك
تكونى فى عينى كل الناس
تكونى الأهل واللمة
بياخدنى الحنين يامًه
ياشال دافى مغطينى فى ليل البرد
يا نخلة شديدة كانت واقفة وسط الدار
بتقطف لى النجوم و الورد
يا سبلة غلة تضحك لى فى غيط القمح
يا لوزة قطن بتفتح سنين الفرح
يانور الشمس لكن ما تغيب عنى
ولو مرة تعب قلبى من الدنيا
تضمينى يِدوب الحزن و ف ثانية
كأن ملاك نزل و أخدنى للجنة
وحشتينى ف آدان الفجر
يا دعوه للسما طالعه و لا تترد
يا نفحه من حنان الرب
أنا دلوقتى بردانه
فين قلبك يدفينى
وفين شالك يغطينى
و فين دعواتك الحلوه
و آآآه يا مٌه
غريبة الدنيا من غيرك
وفينك من وشوش الناس
بناديكى ما بترديش
وكنت زمان اناديكى
فى غمضة عين الاقيكى
دفا و إحساس
خلاص نامت عيون شمسك
عن الدنيا و إيه فاضل غير الضلمه .
