طَبَّق ف جيبَك
ورقه فيها الإسم والتليفون
سلم على اخواتَك
وأمك
شد من شفايفها دعوة
وحُطها ف روحَك
وإنزل
إرمى ع الشارع عينيك
واحضن أغانى الذكريات
وافتكر
لعبك هنا
لعبك هناك
الكورة لما ساعات كتير
كانت بتطلع تجرى ع الدكان
ويبَرَّق البقال عينيه
ويحلف ما انتوا واخدينها
وف الآخر ..
بتطلع جَريّ م البلكونة "أمك"
وتقولّه طب معلش فيسامح
إفتكر لُه حاجات كتيرة كان جدع فيها
علبة سجاير شُكُك
فوارغ الكوكاكولا
اللى انت دايما بتنسى ترجعهالُه تانى
جنيه فضة أخدتُه منُه الصبح
وانت معاكش ولا مليم تروح الشغل
إفتكر لُه كل حاجة جميلة جدا واحضُنُه
يمكن تكون المرة دى المرة الأخيرة
ومش هتلمح ضلُه تانى
المكوجى سلم عليه
وانسى القميص اللى اتحرق من أسبوعين
واضحكلُه من قلبك قوى
بنت الجيران
اللى انت قلبك تحت شباكها بقاله 3 شهور
مطرب وبيغنيلها أغنيات "حليم"
طَبَّق ف جيبَك ورقة فيها الإسم والتليفون
وخلى روحك تكنس الشارع
وتلم كل الذكريات
رَغيّ البنات
على كل عتبه ف كل بيت
و اطلع على كورنيش جديد
و اتجن و اخلقلك وطن
