وقت انفعال الشعر فـ كفوف الطريق ..
انتي اللي صبيتي الوجع ..
وقطعتي رزق التفعيلات من دفتري ..
ضليت جميع المفردات المؤلمه
بسأل شوارع خطوتك
فين المُنى ..؟
العمر جايز يتعدم
وانا لسه ما اتمنتش حد فـ دنيتي ..
ازاي هموت ..
وانا لسه متغرب أمل ..
والدنيا جدعه فـ سد خانة المُحتمل ..
مش قولتي قمر الليل عجوز ..
لما التقينا بود واضح للفراق ..
محض اشتياق للدمع وقت محبيتي ..
يشهد لي ليلك ع الملأ
انا كنت ايه ..
مش بس شاعر ايده اقصر مـ القلم ..
واهب خلايق سكته
دمع الحقيقه الإنسانيه المُطلقه ..
برواز مهاجر للسما ..
مش صورتك انتي مزيّناه
ولا حتى صورتي ..
وضع الخيانه المستمر لبهجتك ..
واخد مكان قلب القمر ..
لا عصيت غُناكي على المشاع ..
ولا حتى خونت الحضن اوقات الزعل ..
انتي اللي خونتي اللحن والرقص الدبيح ..
والشعر والصوت والنغم والريح ..
الكُرّهْ مش عكس المحبه صحيح ..
بس الخراب فـ الحب بيصدي الأمل ..!
