الشوف اوضح ف الفاترينه
==============
عاوز تلبس نضاره ! !!
صدقني انا حاسس بيك
عارف معاناتك
و انت بنظرك الحاد
لابس نضاره
و مقدر احساسك
عارف انك عاوز تعمل ساتر لعنيك
و تحط الكون ف الفاترينه
و تبص عليه
و تشوف م الفاصل و تتفاعل
من بره و بس
و نفسك يخترعو حاجه تفلتر احاسيسك
و تقدمها للناس على انها مصنوعه
طيب مانت بتكتب شعر
ايه مشكلتك
عبر عن كل احساسك فيه
خايف م اللي بيحسوا بهم الناس
لا يشوفو دموعك؟
لا ما تخافش
فكره النضاره دي
طبقها على روحك
ايوة
اتعامل معاهم من نضارة الذات
و سيب فاصل
ما بين كل سطر
و استعين
بالهوامش
و حط مشاعرك
ف فراغ النص
ارجوك
اعمل اي حاجه
غير اني
اشوفك عريان ف قصيده
ما حدش عاوز يقراها
