أرض الوجع
مشهد خارجى
بتوزعوا شيكولاته ليه يا ولاد ؟!
ضحكوا وقالولى
آخر صحابك بقى أب يا شاعر
مشهد داخلى
هيفيد بأية الشعر يا شاعر
والعمر طاير فى الهوى دخان
لا طولت أرض ولا قادر للسما توصل
آخرتها أية وياك؟!
لإمتى هتسيب الخيول ترقص على صدرك
وأنت بتسحب صديد نفس مقطوع
بتلاعب الأيام ( تريك تراك ) فى الضلمة
وما عرفش تلقف عصفورك أحلامك
بتعد الخطاوى تملّلى بالمقلوب
تمشى وترجع لنفس خط البداية
تمد قلبك على صحن الوجع وحدك
ولا فيش شباك شفايف راضى يفتح لك
وبنت من جواه تطلع تناديلك
او حتى تضحكلك
صوت البنات مزازيك
يعزفوا لغيرك
فلمين هتقطف ثمرة شجر ملعون؟!
وكل البنات من تحت الشجر قاموا
سابوك بتعزق أرض الوجع وحدك
دخان دموعك تنفخه آنات
فرحان بحزنك ولا أتصاحبت عليه؟!
والساعة واقفة محتاجة لمسة إيد
لأجل ما ترجع تانى وتكتك
على إيه هتتلكك
قوم معاهم وزع الشربات
