أحمد فخري الأسواني
قالى صاحبى الفيلسوف
ان الفلوس فرافيت ورق
ما بتشترى جرام سعادة
ولا سنتى انبساط
والفلس مش فى الجيوب
مهما عشش فيها مليون عنكبوت
وان السعادة فى الرضا
بكل احكام القضا
قولتله الفين لالالالا
تعرف ايه
على اللى ياكل م الزبالة
منين يدوق طعم السعادة
وايه حياته راح تكون
الا قهوة مر سادة
واللى ماشى وشكله بيه
بغض النظر عن جزمته
وفجـأة واحدة قابلته
مدت ايديها بدمعها
مد ايده فى جيبه
واصطاد الجنيه
ادهولها وقام مشى
والدمع نازل من عينيه
تعرف ايه
عن دمع تلاجه الفقير
وعن فضحته فى الشتا
وكسرة الراجل قصاد الفتارينات
مع اقتراب العيد ومصاريف العيال
عن ام خايفه من دخول الليل
واصوات العيال لو صنية الاكل فاضية
تعرف ايه
عن ذلة النوم ع الرصيف
والعيون اللى بتشرح جثث الميتين
وملقحين فى كل الطرق
مع احترامى الفلسفة
واعترافى ان الحياة فى الاصل اكبر خنفسه
بس الفلوس بتشترى كل شئ
