عاطف حمدان محمد
****** شاهد على العصر *******
**************************
يا ايها السادة القضاة الحاكمين بالعدل
يا كل ندل وكل سارق حلمنا بالزيف
يا "محمد الساعي" ...
يا "سوسن" يا "منار "
يا مجدي افندي نادي على حنا وجوزيف
يا سواقين القطر يا بتوع الخضار
يا دكاترة الرحمة يا أهل الادب يا فلاحين
يا توهة الدنيا اللي خلت عمرنا تخاطيف
يا نُخبة ناخرة في العقول كالسوس
ملِّيت انا من كدبكم ....
وشبعت م التخاريف
يا موحدين لبوا الندا واتجمعوا
يا شلة المجاذيب تعالوا واسمعوا
لا انا كنت يوم عسكر ..ولا اخوان
ولا كان لي مرة قريب من المحاسيب
انا زيكم انسان ولا يرضينيش العيب
الحالة عامة والعَتَه....
بقى لينا كيف
المشكلة ..
مش ضعف ف الشوف والنظر
ازاي هاشوف الحق واضح منجلي
والقلب من كتر اللي شافه كفيف
شاهد انا على عصر من ضمن العصور
وبنولي سور..
على حلمي قتلوني بضمير
سحلوني ف سطور التاريخ والفلسفة
وسقوني مر الثورة ف التحرير
خلوني انافق وارتشي فبقيت شيطان
واهتف بألف لسان مدد .. يحيا الامير
عسكر معاهم .. اخوان فداهم
ولو فلول هاصرخ واقول
واتعب من التصقيف
وصحيت لقيتني وش مجهول الملامح
لا انا قادر اسامح نفسي ولا حتى الزمان
شاهد على موتي وموت كل البشر
لما ارتضينا نعيش كده عفوا بلا اخلاق
اصل الخسارة مش مناصب او فلوس
سر الحضارة يا جميع الحاضرين ..
انسان
