الشاعر غيَّر جلده
محمد سمير مصباح
الشاعر غيَّر جلده
بقي زي فلان الشاعر
الشاعر كمِّل وِرده
ف ديوان التاني الشاعر
شاعر مخلوق من شاعر
فقاقيع بتنزل شاعر
ماهو لولا الأول ألَّف
والتاني عِرف واتعرَّف
ونقل إلي تالت شاعر
مكنتش هتبقي الدنيا
تعرف مخلوق (الشاعر)
ودا شاعر عامل ندوة
وبيحكي عن الإنسان
وسيزيف والطيف والزيف
والكون القاسي الداعر
ودا شاعر ضيف ف الحفلة
وقصايده قلوب ف قلوب
دباديبه تكون القفلة
وبنات وجراح ومشاعر
ودا شاعر دافن نفسه
ف ساحات الوهم الواعر
ودا شاعر ودا مش شاعر
بالدنيا ووجع الناس
ودا جامد ودا حساس
دا طلاسمه بدون مفتاح
ودا سطحي وخيبته نجاح
ودا بقا شاعر بالشاعر
شهرته نزلت للشارع
علي أكتاف غيره الشاعر
واتنكر ليه ف الآخر
دا جزاء من صدَّق شاعر
ودا شاعر بنصقفله
ونقولله الله ع الشعر
ودا شعر بنصقفله
يمكن هيبطل نَعر
كل الجماهير بتصقف
وان كان واقع م القعر
فيه شاعر مرة قابلته
مليان بتاريخ الشعر
بيقول هنا هَنة ورَنة
ومعادلك مش موضوعي
وقعد ساعتين يتكلم
عن نظريات الشعر
ف الآخر قاللي قصيدة
لو باعها ما تبقي بسعر
وعموماً مش موضوعي
أنا واحد مش م الشُعرا
بتمني اني اكتب شَعر !
