من يوم ما خلعتى دراعك من على كتفى
وأنا بردان...بردان....بردان
وبتكتك
وكتافى شوارع شتا مبلوله
دراعتى..دكاكين مفتوحه
وماخشش من ساعه الصبح زبون
وأدينا بقينا المغرب
والليل متسحب على رجلى بالبرد
ورقبتى..صدر كمنجه
بتعيّط
من قرصه إيد العازف
على جمله ف غنوه عن حضن أتنين
مش مع بعض
من يوم ماخلعتى صدرك
من عند دماغى
وأنا بردان
بردان
بردان
بتغطى فىّ
بتكلفت على بعضى
بتدفى ف صورتك ع الجدران
بقرا رسايلك
وبشم بيجامتى
بفرد ريحه البارفان
على وشى
كتفى
دراعى
صدرى
رجلى
وبتكتك
أتكوم فىّ
ف بعضى
متغطى
وكإنى عريان
من يوم مامشيتى
وأنا.......
بواجه كل البرد لوحدى
بواجه مجرم قاتل
بسلام ...وحنان
