وانا وانتي بنكتب آخر كلمه ف أعمارنا
حطي إيديكي ف دهاليز القلب
ومرري روحك فوق أوجاعي برقّه
وسمّي عليّا وقولي لآخر عيّل خلّفناه... الحلم إله
عشناها بنحلم
وأكيد هنسكّ بيبانها علينا وأرواحنا بتحبي ف صالة حلم فسيحه
رغم إن الدنيا جميله ف عين البعض ما تتغرّوش..
الدنيا الحلوه ساعات بتصمم تبقى قبيحه
وانا وانتي أكيد هنكّملها
واحنا بنتملّى كلام الربّ بأرواحنا ونسمع مزاميز جبريل وإيديه بتطبطب ع البشريه الفجريه وتسقيهم من جنات الخلد مياه الرحمه
وانا وانتي بنكتب آخر كلمه ف أعمارنا
وحياة عمّي اللي أنا مش بانساه تاخديني ف حضنك وتغطيني برمش عنيكي من الزحمه
وتسيبي الشاعر جوايا يقوم من جوّاه
................................ يتهجى الله
************
سعيد شحاتة
