مدمن كتابة
شعر : مجدى عبد الرحيم
الشعر مش ..
قعدة قهاوى فى وسط البلد
ولا ندوة ..
ف الاتيلية
وكلام متذوق ..
لحضرة جناب
الناقد
اللى جاى يجرى ..
ف الطريق
ومتأخر ..
كان فى ندوة تانية
ويدوب فتح ديوانك ..
ف الاشارات
الشعر مش ..
كلام بايت ..
ودراسة ..
بتتقال للكراسى الفاضية
مابين انشغال الزملا
بشنط المؤتمر
والاكل ..
والتصوير
والمشى ع الشط
ومعاكسة البنات
الشعر مش قصيدة
بينشرها لك صديقك مجاملة
تردها له
دعوة ف امسية رسمية
بملاليم ..
بيقولوا عليها ..
مقابل مادى
الشعر مش خناقة ..
على مين يقول الاول
ومين هايطول ف القوالة
وانت مضطر تسمع
100 واحد
بيسموهم مجازا
شعرا
الشعر مش ..
ديوان ملطوع 10 سنين ..
مستنى النشر
فى سلسلة حكومية
وكل ماتسأل :
" امتى ديوانى يشوف النور"
يقول لك المسئول :
" لسة شوية "
مع انه ناشر من كام يوم ..
لواحد صاحبه
وللبت ام عيون زجاجية
الشعر ياسادة ..
تعبنى وعذبنى
ومش ناوى يطلع من جتيتى
وخلانى مدمن كتابة
الشعر قهر للنفس الابية
ال مستنيه ..
طلوع الروح
ف ارجوكم
تسامحونى
على جنونى
انا ماشى ..
خلاص
فكان لازم ..
اقول ..
وابوح
