احمد زكريا البهنساوى تذكرو هذا الاسم جيدا مشروع شاعر عامية اتى بقوة يمتلك تفاصيله الخاصة التى تصنع ذاكرة مشتركة
لغته عامية بسيطة عميقه تشتبك مع الواقع من خلال تصوير فنى وتداعى جميل لكل هذه التفاصيل يشكل مشهداً عاماً للبيئة المصرية بكل دلالاتها انتظرو هذا الشاعر
الذى ارسل لى قصيدته فامتعتنى للغاية وكنت حريصا على نشرها فى صفحتى ، عمار يامصر بولادك
# سالم الشهبانى#
زى مثلاً
ـــــــــــــــــــــــــ
(1)
زي مثلا صوت ابويا
لما يصرخ فيا ذاكر
زي مثـلا أي حد
شد ايدي وقاللي عافر
(2)
زي مثلا كل حاجة جوة
بيتنا فيها شيء
زي صورة تكون قديمة
زي فرش يكون عتيق
(3)
زي فـرحة جامدة جداً
لما تلقى اصحاب زمان
زي اول حضن بنت
تحس جوآه بالامان
(4)
زي خروجة جامدة فعلاً
واتصورت فيها صورة
زي اول مرة تلعب
ويا صاحبك فيها كورة
(5)
زي فيلم جديد في سيما
زي اول كسر فيك
بس قشطة " جت سليمة "
(6)
زي اول حب ليك
زي دمعة من عنيها
لما خافت يوم عليك
زي مثلا بوسة "خطف"
لما حـبُك كان ماليك
(7)
زي مثلا يوم عياك
لما اصحابك جم زاروك
زي مثـلاً لما باعوا
كل حاجة
واشتروك
(8)
زي مثـلا 100 قصيدة
جوة درجي مكتوبين
زي مثلا ويــا منهم
كــام رسالة متعانين
(9)
زي مصروف كـان قُــليل
زي شكلك وانت عيل
زي قلبك لما ميـّل
زي ألف حاجة شكل
زي ألـف ذكرى حلوة
من جمالها متتحكيش
زي الف ذكرى حلوة
جوة منا متتنسيش
